БИШКЕК, 21-фев — Sputnik. "2015-жылы улуттук экономиканы стратегиялык тармактарды реформалоо жолу менен бекемдейбиз", — деди экономика министри Темир Сариев.
Анын айтымында, реформа жагымдуу инвестициялык климат, бизнес-чөйрөлөрдү түзүү жана мамлекеттик башкаруунун ачык системасын түзүү максатында жүргүзүлүп жатат.
"Мунун баары жергиликтүү жана чет элдик инвестицияны тартууну шарттайт. Андан сырткары бизнестин мамлекеттик органдар, жергиликтүү коомчулук менен өз ара иштешүүсүнүн эрежелерин аныктаган укуктук ченем актыларын өнүктүрүү да каралат", — деп айтты Сариев.
Бардык жасала турган иштер жаңы иш орундарын түзүп, ЕАЭБдин өлкөлөрүнүн алкагында республиканын экономикалык потенциалын ишке ашырууга көмөкчү болот. Энергетика тармагында Жалал-Абад облусундагы Таш-Көмүр шаарында жылына 50 миң тонна продукция бере турган темир ээритүүчү заводдун курулушу башталат. Андан сырткары Кеминде жылына 1, 2 миллион тонна күлбото чыгаруу кубаты бар завод ишке киргени турат. Мындан сырткары 2017-жылга чейин кичи энергетиканы өнүктүрүү боюнча концепция иштелип чыгат.
Айыл чарбасын колдоо үчүн республикадагы дыйкандарга лизинг берүү максатында 860 айыл чарба техникаларын сатып алуу пландалууда. Андан сырткары айдоо аянттарын кеңейтүү күтүлүүдө.
Сариев тоо-кен тармагына жана жаңы ишканаларга тартыла турган түз инвестицияларды 15-20 пайызга көбөйтүүнү пландап жаткандыгын айтып берди.
"КРдин экономикасын бекемдөө боюнча бардык иш-чаралардын аткарылышы билим берүү, саламаттыкты сактоо, пенсия жактан камсыздоо системасын жакшыртуу сыяктуу социалдык программалардын кеңейтилишине жана башка дагы мамлекеттин социалдык милдеттенмелерди камсыздоого шарт түзөт", — деп түшүндүрдү экономика министри.
Пландалгандарды ишке ашыруучу процесске бизнесмендер менен жарандык коомчулуктун активдүү жардамы зарыл жана аларды тартуу керек.
