БИШКЕК, 20-фев — Sputnik. Голландиянын аскер эксперттери текшерүүдө Ростов областында Россиянын "аскердик аракеттерин" аныктаган жок деп билдирди РФтин коргоо министрлигинин келишимдерди аткарууну көзөмөлдөө башкармалыгын жетекчиси Сергей Рыжков.
"Текшерүү аяктагандан кийин инспекциялык топтун нидерланддык жетекчиси аталган райондо эл аралык милдеттемелерге ылайык Россия Федерациясы ЕККУ мамлекеттерине билдириши керек болгон аскердик аракеттер жок экендигин маалымдады" — деди Рыжков РИА Новости агенттигине.
Ошондой эле мындай тыянакты нидерланддык топтун ишине катышкан Германия менен Даниянын да өкүлдөрү ырастаганын белгиледи ал.
Бул 2011-жылдагы Вена келишиминин алкагында Россияда быйыл акыркы жолу өткөрүлгөн кенен текшерүү болуп эсептелет. Аталган документте каалаган мамлекетте жылына үч жолу текшерүү мүмкүнчүлүгү каралган. Биринчисин өткөн жумада украин адистери жүргүзүп, россиялык аскерлердин иш-аракетинде мыйзамсыз эч нерсе табышкан эмес. Экинчисин түрк эксперттери жүргүзүп, алар да Ростов областында россиялык аскерлердин эч иш-аракеттери жүргүзүлбөгөндүгүн ырастаган.
Мурдатан Москва өз аскерлерин Украинага жибергендиги тууралуу Киевдин айыптоолорун бир нече жолу четке кагып, Украинанын түштүк-чыгышындагы окуяларга эч тиешеси жоктугун билдирген эле. Кийинчерээк Украинанын Башкы штабынын жетекчиси Виктор Муженко өлкөнүн аймагында россиялык аскер курмадарынын жоктугун моюнга алган болчу.
