БИШКЕК, 17-фев. — Sputnik. КР Транспорт жана коммуникациялар министрлиги тарабынан Бишкек – Нарын –Торугарт автоунаа жолунун Бейше-Булак аймаганда 19-20-февраль күндөрү жолго кулап түшүү ыктымалдуулугу жогору болгон жардын бөлүкчөсүн мажбурлап түшүрүү жана тазалоо иштери жүрөт.
Ошого байланыштуу 19-февраль күнү Бишкек шаарынан, Кочкор районунан Нарын тарапты көздөй жүргөн авто унааларга жана жүргүнчүлөргө саат 10:00дөн саат 18:00гө чейин жол каттамы Кочкор айылынан жана Сары-Булак аймагынан жабылат. Ал эми Нарын шаарынан Бишкек тарапка жол жүргөн авто унааларга жана жүргүнчүлөргө 12:00дөн 18:00гө чейин Нарын шаарынан жана Оттук айылынан жол каттамы жабылат.
20-февраль күнү Бишкек – Нарын – Торугарт унаа жолундагы автоунааларга жана жүргүнчүлөргө саат 08:00дөн 18:00гө чейин жол каттамы жабылат.
Белгилей кетсек, 1-февраль күнү Бишкек – Нарын – Торугарт автоунаа жолунун Бейше-Булак участкасында жар көчүп, жолду бөгөп калган. 2-февраль күнү жол толугу менен тазаланган.
ӨКМнын өзгөчө кырдаалдарды болжолдоо жана мониторинг департаментинин адистери тарабынан аймакта жардын бөлүкчөсүнүн түшүү коркунучу бар экендиги аныкталган. Айдоочулардын жана жүргүнчүлөрдүн коопсуздугун камсыз кылуу үчүн жолго түшүү коркунучу болгон жарды атайылап түшүрүү чечими кабыл алынган.
