Бишкек, 11-фев. — Sputnik. Бишкектеги болгон маалымат жыйынында Аида Салянова "Ата Мекендик" депутаттарына күнөө тагылган иш прокуратурага келип түшпөгөндүгүн, эгерде келген болсо, башкы прокуратура коюлган айтыптарды тастыктап, ишти сотко ашырмактыгын айтты.
Салянова "Ата Мекендин" айрым депуттарына мародерчулук фактысы боюнча деп кылмыш иши козголуп, аны прокуратура эмес, ИИМ, УКМК тергегендигин, бирок, аларга айып угузуу фактысы болбогондугун айтты.
"Ата Мекен" партиясынын айрым депутаттарына мародерчулук фактысы боюнча деп кылмыш иши козголуп, кийин кээ бир адамдардын үстүнөн кылмыш иши кыскарган. Прокуратура негизинен бул иштерди тергеген эмес, аны Ички иштер министрлигинин, Улуттук коопсуздук кызматынын кызматкерлери көп убакыт тергеди. Бул ишти Рысалиев мырза Жаза аткаруу мамлекеттик кызматын жетектеп турганда да карады, иш ошол кишинин көзөмөлүндөгү топ аркылуу жүргүзүлдү. ИИМде дагы анын өзү ишенген кишилерден турган топ тергеген. Бирок, бул иш "Ата Мекен" партиясынан депутатына айып угузуу фактысы болбоду, тергөөдө "Ата Мекендин" депутаты тиешеси бар экен деген бир дагы факты табылган жок. Эгерде ошондой фактылар болсо, прокуратура сөзсүз түрдө өзүнүн мүмкүнчүлүгүнөн пайдаланып, ишти тастыктап, сотко ашырмак", — деп билдирди экс-башкы прокурор Салянова.
2012-жылы Бишкек шаарындагы тергөө абагында отурган Абдулла Юсупов аттуу адам жаран "Ата Мекен" фракциясынын депутатынын 2010-жылдагы апрель айларында мародерчулугуна катыштыгы бар деп бир нече маалыматтары жарыя кылган. Аталган фракциянын депутаттары муну чындыкка дал келбейт деп четке кагып, бирок кыргыз коомчулугунда чоң талкуу жараткан.
