Казакстан менен болгон бажылык башкаруу 1-майдан тарта токтотулат

Жазылуу
2015-жылдын май айынан баштап коңшу мамлекет менен болгон бажылык башкаруунун токтотулушу Кыргызстандын бул убакыттан баштап Евразиялык экономикалык биримдигине толук мүчө болушунан улам ишке ашып жатат. Андыктан чек арадагы товардын экспорту менен импортун текшерүү да өзгөрөт.

БИШКЕК, 10-фев — Sputnik. "1-майдан тарта Казакстан менен болгон бажылык башкаруу токтотулат", — деп Улуттук статистикалык комитетинин тышкы экономикалык иштердин статистикасы бөлүмүнүн башчысы Гүлсара Сулайманова билдирди.

Анын айтымында, Кыргызстан Евразиялык экономикалык биримдигинин толук мүчөсү боло тургандыктан мындай процедурага муктаждык болбой калат.

"Россия, Казакстан, Беларусь жана Армения менен болгон өз ара сооданын көлөмүн эсептөө мамлекеттик статистика органдары тарабынан чарбалык статистикалык субъектердин берген отчеттору аркылуу ишке ашат", — дейт Сулайманова.

Адис белгилегендей, статистиканы эсептөөдө олуттуу өзгөрүүлөр болот.

"Биздин ЕАЭБ менен Казакстан менен жалгыз гана чек арабыз болот. Тийиштүү субъектер бул өзгөрүүлөрдү билиши керек. Бишкек жана Чүй облусунда субъектер абдан көп. Алардын саны 8 миңден ашык. Алар да отчет тапшыруудагы өзгөрүүлөр жөнүндө билиши керек", — деди Улуттук статистикалык комитеттин төрагасынын биринчи орун басары Жанбулат Байжуманов.

Өткөн жылдын статистикасына караганда, Кыргызстандын товар айлануусунун 70 пайыз көлөмү КМШ мамлекеттерине туура келет. Анын ичинен ЕАЭБке мүчө мамлекеттерге эң көп туура келет.

Байжуманов ошондой эле, чек аралардын ачылышынан улам бул сандар дагы да жогорулашы мүмкүндүгүн кошумчалады.

Россия, Беларусь жана Казакстан 2014-жылдын 29-майында Астана шаарында Евразиялык экономикалык биримдик түзүү жөнүндө келишимге кол коюшкан. Ал 2015-жылдын 1-январынан тарта күчүнө кирген. 2-январда ЕАЭБке Армения да кошулган. Май айында Кыргызстандын да кошулушу күтүлүп жатат.

Жаңылыктар түрмөгү
0