БИШКЕК, 10-фев — Sputnik. Кыргызстан 2015-жылы жашылча жана мөмө-жемиштердин эккен жер аянттарын көбөйтүү ниетинде деп билдирди Sputnik сайтына Айыл чарба жана мелиорация министрлигинин жер иштетүү боюнча башкармалыгынын жетекчиси Жигиталы Жумалиев.
Анын айтымында, Республикадагы айдоо жерлердин көбөйүшү Кыргызстандын Евразиялык экономикалык биримдикке киришине байланыштуу болууда. Өлкө мындан улам, пайдаланылбай турган жерлердин эсебинен, айдоо аянттарды азыркыдан 4 миң гектарга арбытып, аны 1,185 млн. гектарга кеңейтүү ниетинде.
"Кыргызстанда былтыр 1 миллион 181,2 миң гектар жер иштетилген. 2013-жылга салыштырмалуу айдап, себилген жер 5,9 миң гектарга көбөйгөн. Фермерлер баарынан көп дан эгиндерин — 661,3 миң гектарга эккен. Алардын ичинен жүгөрү — 92,1 миң гектар, буудай – 340 гектар, буурчак өсүмдүктөрү – 61 миң гектар", — деп билдирди Жумалиев.
Жумалиев фермерлерге мөмө-жемиштерди көп өстүрүүгө кеңеш берип жаткандарын айтты.
"Буудайдын, кызылчанын жана мөмө-жемиштердин аянттары кеңейтилет. Эмне үчүн алар? Себеп дегенде, бул продукцияларга суроо-талап көп болгон өлкөлөргө сатууга жакшы мүмкүнчүлүк бар. Биздин продукциялар экологиялык жактан тазалыгы жана даамы менен айырмаланат, алар – Баткендин өрүгү, абрикосу жана гиласы, Ысык-Көлдүн алмасы. Андан сырткары биздин республикада өстүрүлгөн буурчак өсүмдүктөрү, аны менен катар эле кызылчанын аянтын 8 миңгектарга көбөйтөлү деп жатабыз", — деди аталган министрликтин өкүлү.
Ал республика боюнча айдо аянттары арбын аймактар: Чүйдө – 400 миң гектар, Ысык-Көлдө – 182, Ошто – 177 миң, Жалал-Абадда – 148 миң гектар жер бар.
"Алар өндүргөн продукциясын эл аралык лабораториядан текшерилгендиктен, сапатына кепилдик беришет жана сата турган рыноктун кеңейишине үмүттөнүп жатышат", — деди Жумалиев.
Аталган министрликтин өкүлү фермерлер жаңы иш-пландарга даярданып жана агрокредиттерди алууга мамлекеттин жардамына ишенип жаткандыгын айтты. Өкмөт быйыл аларга 6 миллиард сом бөлүүнү пландагандыгын кошумчалады.
