БИШКЕК, 9-фев — Sputnik. Өспүрүмдөр арасында жасалган кылмыш сегиз пайызга өсүп, жалпы катталган кылмыштын үч пайызын түзгөн. Бул туурасында ИИМдин коомдук коопсуздукту сактоо башкы башкармалыгынын жетекчиси Эркин Баев маалымдады.
"ИИМ тарабынан жана аткаруу бийлигинин кызыкдар болгон органдык кызматкерлери тарабынан мектептин окуучулары, дегеле жашы жете элек балдар арасында тиешелүү алдын алуу, түшүндүрүү иштери жүргүзүлүп жатат", — деди Баев.
Аймактар боюнча алганда, эң көп кылмыш Бишкек шаарында жасалып, 268 факты катталган. Дубандар боюнча ала келгенде, кылмыштын эң көбү Чүйдө — 214, эң азы Таласта — 28 учур катталган.
2014-жыл ичинде Кыргызстанда ИИМдин Жашы жете электердин арасындагы укук бузуулардан алдын салуу боюнча борборуна 1513 бала түшүп, мурдагы жылга салыштырмалуу көбөйгөн.
"Борборго түшкөн балдардын 1149у мектепте окуган, 289 эч жерде окубаган, 38и мектепке чейинки жашта, 15-20 пайызы кыз балдар болгон. 1513 баланын ким экендигин тактап, ата-энелеринин колуна тапшырдык", — деди ИИМдин борборунун жетекчиси Абдымомун Камалов.
Камалов 13-14 жаштагы балдар арасында сабаты жоюлбагандар кездешээрин, аларды Жашы жете электердин арасындагы укук бузуулардын алдын алуу борборунун кызматкерлери окуганга, санаганды үйрөтөөрүн билдирди.
Балдардын үйдөн качкан себебин иликтей келгенде, негизинен үйдөгү тынч эмес абал жана жагымсыз жагдай болуп чыкан.
