БИШКЕК, 9-фев — Sputnik. 2013-жылдан бери Кыргызстан боюнча жашы жете элек 767 бала жоголгон. Алардын ичинен 726 бала табылып, 41 бала азыр дайынсыз. Бул туурасында ИИМдин коомдук коопсуздукту сактоо башкы башкармалыгынын жетекчиси Эркин Баев маалымдады.
Республика боюнча бүгүнкү күндө издөө салынган 41 бала бар. ИИМ өкүлүнүн айтымында, жашы жете элек балдардын жоголушуна ар кандай жагдай, себеп түрткү болуп жатат.
"Балдар кээ бирөөлөрү ата-энелери тарабынан зомбулук көргөндөн кийин, үйдөгү ар кандай абалдардан улам кеткендер бар. Табылып, кармалгандарын үйүнө кайтарып жатабыз. Жылдын башында, 19-24-январда аткаруу бийлигинин бардык мамлекеттик органдар тартылган "Камкордук"деп аталган ыкчам издөө рейдин өткөрдүк. Бир жума ичинде биз 580 кароосуз, көзөмөлсүз жүргөн балдарды таптык", — деди Эркин Баев.
