БИШКЕК, 5-фев — Sputnik. Жогорку Кеңештин депутаты Өмүрбек Бакиров Бажы Биримдигине кирүү боюнча элге жеткиликтүү маалымат бербей жаткандыгын, Өкмөт алдында жакынкы үч ай ичинде калкка түшүнүктүү, жеткиликтүү кабардар кылуу милдети тургандыгы айтты.
"Бажы биримдигине толук кандуу кошулушубузга үч айдан аз убакыт калды. Кайсы жерге барбайлы, бул боюнча карапайым элдин арасында суроолор абдан көп болууда. Бажы биримдигине кирүүгө эл каршы эмес, бирок, аларда жеткиликтүү маалымат жок, калк түшүнбөй жатат. Өкмөт бул жаатта маалыматтык кампанияны активдүү алып барышы керек. Интернет булактарынан издегени менен түшүнүктүү эч нерсе таппай жаткандыгын айтып жатышат. Өкмөт берген маалыматтар карапайым элге жеткиликтүү болушу керек", — деди Бакиров.
Парламентарий Бажы биримдиги боюнча керектүү маалыматты өлкөнүн жарандарына жеткириш үчүн атайын сайт ачып, зарылдыгына жараша бекер чала турган түз номурларды уюштуруу зарылдыгын белгиледи.
"Өкмөткө бул боюнча сайт ачууну сунуштаар элек. Он-лайн операторлорду отуругузуп, чалгандардын суроосуна тиешелүү жоопторун бериш керек. Интернет жок жерге телефондон бекер чалуучу түз номурларды ачуу зарылдыгы турат. Ири ишкерлер балким маалыматты таба алат, ал эми чакан ишкерлер маалымат алышы кыйын болуп жатат. Мамлекет алдын ала толук, туура маалымат берип, үч ай ичинде жеке ишкерлерди дайындашы — учурдун талабы", деп кошумчалады Бакиров.
