БИШКЕК, 1-фев — Sputnik. 2014-жылы борбор калаада 210 каршылык акциясы өткөн. Бул тууралуу Бишкек мэриясынын былтыркы жылкы отчетунда айтылат.
Тактап айтканда, 2014-жылы Бишкек шаарында социалдык-экономикалык жана тиричилик мүнөздөгү 92 митинг өтсө, саясый мүнөздөгү 118 митинг болгон.
Ал эми 2013-жылы 452 каршылык акциясы өткөн. Анын ичинен социалдык-экономикалык жана тиричилик мүнөздө 149 митинг болсо, саясый мүнөздөгү 303 митинг өткөн.
"Учурда митингдердин алдын алуу боюнча аракеттер жасалып жатат. Ошондой эле, Бишкектеги жаңы конуштарда социалдык-тиричилик мүнөздөгү түшүндүрүү иштери жүрүп жатат", — деп айтылат отчетто.
Жарандар негизинен жаңы конуштардын социалдык-тиричилик жана экономикалык көйгөйлөрүнөн улам митингге чыгышкан. Ошондой эле, басылып алынган жерлерди мыйзамдаштыруу, электр энергиясынын өчүшү, жолду оңдоо жана ичүүчү суунун тартыштыгы да митингге чыгууга себеп болгон.
