БИШКЕК, 26-янв — Sputnik. 2015-жылы айыл чарба өсүмдүктөрүнүн айдоо аянтын 1 миллион 200 миң гектарга чейин жеткирүү белгиленген. Бул өткөн жылга салыштырмалуу 4 миң гектарга көптүк кылат. Бул тууралуу Жогорку Кеңештин комитетинин жыйынында Айыл чарба жана мелиорация министринин орун басары Жаныбек Керималиев билдирди. Аталган комитетте "2015-жылдын жазгы-талаачылык жумуштарын өткөрүүгө даярдыктын жүрүшү жөнүндө" өкмөттүн маалыматы угулду.
Маалыматка ылайык, жазында 29 миң тонна буудай үрөнү керектеле турган болсо, азыркы тапта 24,35 миң тоннасы (84%) даяр. 28 миң тонна арпа керектелсе, анын 69% даяр.
Техникалардын 83%ы даяр. Тактап айтканда 21 098 трактордун 17 851и азыркы күнгө даяр.
Андан сырткары жазгы айдоого 340,8 миң тонна минералдык жер семиркич керек. Жазгы айтап себүүгө керектеле турган 40 миң тонна дизелдик майдын 34 миң тоннасы азыр даяр.
