БИШКЕК, 26-янв — Sputnik. Кыргыз ССРинен Улуу Ата Мекендик согушка аттанып, дайынсыз болгон жоокерлердин аты-жөнү такталууда. Алардын сөөгү кайсыл жерге көмүлгөндүгүн атайын издөө салган отряддар улам аныктап чыгууда.
Маалыматтарга таянсак, 1941-1945-жылдары Улуу Ата Мекендик согушка кеткен он миңдеген жоокерлер, сержанттар жана офицерлер дайынсыз деп эсептелип жүрөт.
Курман болгондордун элесин сактап, эскерип калуу максатында 1941-1945-жылдары Улуу Ата Мекендик согушка Кыргыз ССРинен чакырылгандарды издөө иштери кеңири жүрүүдө.
Жакын арада дайынсыз болгондордун бир тобунун көмүлгөн жерлери табылды. Бул "Мемориал" деп аталган жалпы маалыматтар топтомунун алкагында атайын издөөлөрдү уюштурган отряддардын түйшүктүү ишинин жемиши болду.
Кыргызстандан бул согушка кетип, кайтпай калгандарды издөө боюнча бишкектик Каныбек Мырзаканов иш алып барып келет.
Өкмөттүн маалымат кызматы буга чейин дайынсыз деп эсептелип келген 60 адамдын тизмесин жарыялады. Алар Кыргызстандын ар кайсы аймактарынан жана ар кайсы улуттун өкүлдөрү.
"Табылган 60 адамдын тизмеси башталышы эле. Тизмеде дагы 140ка жакын адам бар, аларды тактап жатабыз", — деди Каныбек Мырзаканов.
Согуштан кайтпай калгандардын элесин түбөлүккө калтыруу үчүн РФ президенти Владимир Путиндин жарлыгы менен "Эч ким, эч нерсе унутулбайт" деп аталган ураандын алдында "Мемориал" жалпыланган маалыматтар топтому түзүлгөн. Анын максаты – согуштан жакындары кайтпай калган миллиондогон адамдарга жакындарынын тагдырын билип, кайда көмүлгөндүгүн тактоого мүмкүнчүлүк берүү.
Быйыл 9-майда Улуу Жеңишке 70 жыл болот.
