БИШКЕК, 21-янв — Sputnik. Жогорку Кеңештин депутаттары пленардык жыйында Башкы прокурор Аида Салянованын өз ыктыяры менен жазган арызын карап, аны жактырды. Салянованын жазган арызын канааттандыруу үчүн 57 депутат "макул", 18 депутат "каршы" деген добушун берди.
КСДП фракциясынын депутаты Ирина Карамушкина Аида Салянованын кетип жатканына ичи ачышып жатканын билдирип, бул кызматта иштөө үчүн саясый эрк керек экенин кошумчалады.
Депутат Нарынбек Молдобаев президент Атамбаев буга чейин Аида Салянованы иштейт деп айтканын, эми эмне үчүн мындай болуп кеткенин сурап кызыкты.
Ал эми депутат Өмүрбек Абдрахманов Салянова жергиликтүү ЖМКларга берген маегинде анын күйөөсүнө карата атайын жасалма иштер уюштурулуп жатканын айтты деп билдирди. Ошондой эле, Аида Салянова өзү Жогорку Кеңешке келмейинче, бул маселени карабоого чакырды.
Бирок, Жогорку Кеңештеги Адам укуктары конституциялык мыйзамдуулук жана мамлекеттик түзүлүш боюнча комитетинин Аида Салянованын жазган арызын канааттандыруу чечими жалпы добуш берүүгө коюлуп, депутаттардын көпчүлүгү аны колдошту.
Регламенттик тартип боюнча депутаттардын үчтөн бири "макул" деп добуш берсе, Алмазбек Атамбаевдин ЖКга жолдогон каты канааттандырылып, чечим кабыл алынат.
