БИШКЕК, 20-янв — Sputnik. Ири мамлекеттердин геосаясый оюндары жана алардын кармашуусу радикализмдин активдешүүсүнө жана терроризмдин өсүүсүнө алып келүүдө. Мындай пикирин "Дин, укук жана саясат" көз карандысыз аналитикалык борборунун директору Кадыр Маликов маалымат жыйында билдирди.
"Сырттан туруп максаттуу түрдө чагымчыл аракеттер чоң жаңжалдардын чыгуусуна алып келүүдө. Анын кесепетинен эки цивилизация кагылышып атат, тактап айтканда ислам дини менен христиан динин кагылыштырып жатышат. Бул жасалма чагымчыл аракеттер баш аламандыкка алып келет. Мындай аракеттер Жакынкы Чыгышта исламга эч кандай тиешеси жок такфиризм идеологиясынын жайылышына алып келүүдө", — деди ал.
Кадыр Маликов ошондой эле, бир катар мамлекеттерде жасалып жаткан зордук-зомбулуктар бурмаланып, кээде ал көңүл сыртында калып жатканын кошумчалады. Мисалы, Палестина, Сирия, Украинадагы анык зордук-зомбулуктар бурмаланып, кээде ал тууралуу эстелбей да калып жатат. Зордук-зомбулукка үгүттөгөн ар бир чакырык терроризмдин деңгээлинде айыпталышы керек. Эки стандарт жана эки жүздүүлүк болбошу керек экенин ал кошумчалады.
