БИШКЕК, 20-янв — Sputnik. Учурда бир катар мамлекеттерде ислам динине карата максаттуу түрдө чагымчыл аракеттер жасалып жатканын "Дин, укук жана саясат" көз карандысыз аналитикалык борборунун директору Кадыр Маликов маалымат жыйында билдирди.
"Эки стандартты колдонгон геосаясый оюндар бүгүн дүйнөгө коркунуч туудуруп жатат. Ислам дүйнөсүндөгү абал азыр олку-солку болууда. Экстремизм менен күрөшүүдө эки жүздүү стандартты колдонуу, радикалдык топторду жең ичинен колдоо бул аймактарда туруксуз абалдын чыгышына шарт түздү", — дейт ал.
Маликов, НАТОго мүчө мамлекеттердин терроризмге каршы күрөшөбүз деген шылтоо менен бир мамлекеттин ишине аскердик жактан кийлигишүүсүн, ошондой эле, Жакынкы жана Ортоңку Чыгышка "демократияны орнотобуз" деген аракеттерин бүт ислам дүйнөсүн туруксуздаштырууга болгон аракет деп баалады.
"Дин, укук жана саясат" көз карандысыз аналитикалык борборунун директору Кадыр Маликов Сирия менен Иракта өздөрүн "Ислам мамлекетибиз" деп атаган топтор эми Борбор Азияда дагы баш аламандыктарды уюштурууга аракет көрүп жатканын белгиледи.
"Өздөрүн "Ислам мамлекети" деп атаган топтордун катарында "Маврына нахр" деген кыймыл түзүлгөн. Бул термин "Борбордук Азия" дегенди түшүндүрөт. Анын мүчөлөрүнүн катарында кыргызстандын, тажикстандын, өзбекстандын жана казакстандын тургундары бар. Алдын ала тастыкталбаган маалыматтар боюнча Борбор Азияда баш-аламандык кылууга 70 миллион долларга чейин каражат бөлүндү делинүүдө", — деди ал.
"Ислам мамлекети" тобунун мындай аракеттери өзгөчө Кыргызстандын түштүк аймагы үчүн өтө кооптуу экенин Маликов баса белгиледи. Себеби, Кыргызстандын түштүк аймагы Фергана өрөөнүнө ачылган эшик катары бааланат. Андан сырткары бул дестабилдештирүү аракеттеринин негизги максаты Өзбекстандагы абалды туруксуздаштыруу экенин Маликов кошумчалады.
