Терракт уюштурабыз деген топ жана шейит болууга даярданган лидер абакка отургузулду

БИШКЕК, 12-янв — Sputnik. УКМКнын Ош облустук жана Ош шаардык башкы башкармалыгы 2014-жылы Кыргызстанда жана Өзбекстанда бир нече жардырууларды уюштурууну пландаган террористтик топту кармаган. Алгач, топтун лидери, өзүн шейиттикке алдын-ала даярдап келген 22 жаштагы Адахам Раимжанов колго түшүрүлгөн. 

УКМКнын Ош облустук жана Ош шаардык башкы башкармалыгынын маалыматында, Раимжанов — афган-пакистан аймагында даярдыктан өткөн, 2010-жылы Пакистан аймагында "Өзбекстан Ислам кыймылынын" (ӨИК) катарында согушуп, алдыңкы чабуул жасоочу топто жүргөн, тажрыйбалуу согушкер. Кармалган топтун ичиндеги идеялык жагынан абдан берилген жана даярдыгы күчтүү террорчулардын бири. 

Ал УКМКнын Ош облустук жана Ош шаардык башкы башкармалыгынын ийгиликтүү жүргүзүлгөн операциясынын негизинде ноябрь айында колго түшүрүлгөн. 

Кыргызстандын УКМКсы Өзбекстандагы жардыруунун алдын алды 

"Өзбекстан Ислам кыймылынын" катарында жүрүп, кийин эң агрессиялуу деген "Ислам жихадынын биримдиги" деп аталган топко кирип, Өзбекстандын Анжияндагы улуттук коопсуздук кызматынын имаратында жана Ташкентте жардыруу уюштуруу тапшырмасын алган", — деп билдирди УКМКнын маалымат кызматынын жетекчиси Рахат Сулайманов. 

Ага жасалма паспорт менен Ошко кайтып, Сириядан келген ячейкалар менен сүйлөшүп, байланышты жандандыруу милдети тагылган. Адахам жардыруу боюнча адис болуп калган, даярдыгы күчтүү, сырттан келе турган 3 террористке жардыруучу заттарды жана Тажикстандын паспортторун даярдап бермек. Бирок, алар документтер начар сапатта жасалгандыктан, Тажикстандан чыга албай калышкан. Өзү да жасалма паспорт менен теракт даярдоого келген Адахам Раимжановду Кыргызстандын атайын кызматы эки күндөн кийин эле колго түшүргөн. Ошентип, УКМКнын Ош облустук жана Ош шаардык башкы башкармалыгынын кызматкерлеринин аракетинин улам, бактыга жараша, Өзбекстандын эки шаарында теракт болгон жок.

"Аталган террордук топ жардыруу заттарын даярдаш үчүн Түркиядан 200 литр аммиак кислотасын алып келүүнү пландап, аны сактоо боюнча атайын жайларды даярдай баштаган. Жардыргычтарды жасоочулар келбей калгандыктан, Адахам Раимжанов алар менен электрондук почта аркылуу кабарлашып, жардыргычты жасоонун жол-жобосун сурап, шейит болууга даярдана баштаган", — деп билдирди Ош облустук жана Ош шаардык башкы башкармалыгынан.

Бул маалыматты учурда кармалып, жаза мөөнөтүн күтүп жаткан Адахам Раимжанов өзү да тастыктады. 

"Өзбекстан мамлекетине каршы жасайлы дегенбиз. Бул жакта кандай кырдаал болот, өлүш керек болсо, жанымдан кечем деп келгенмин", — деди террорчу Раимжанов. 

Террорчу: Ислам дини боюнча билимимди тереңдетишим керек

Террорчу Адахам Раимжанов эми Өзбекстанда жардыруу уюштура албайт, бирөөнүн өмүрүнө коркунуч жарата албайт, бирок, кайрадан өзгөрүп, ниетин, дилин оңдой алабы деген суроо пайда болот. 

"Мурда туура жолдомун деп ойлочумун. Кийин бул жерден мен тандаган жол туура эмес экендигин түшүндүрүштү. Негизи менин бул туура же бул натуура деп ажырата турган билимим жок. Карап көрсөм, ислам боюнча терең билим алышым керек экен. Менин алдыдагы максаттарымдын бири исламды тереңдеп үйрөнүү болуп турат. Жакшы билбесең адашат экенсиң. Мындай кадамга барганыма өкүнөм",— дейт башын жерге салган Раимжанов.

Массалык жихад баштайбыз деп ниеттенген Адахам Раимжанов эми мыйзамдардын "Жалдоочулук", "Терракт даярдоо", "Мыйзамсыз куралдуу топту түзгөндүк", "Жасалма паспортту пайдалангандык", "Чек араны мыйзамсыз кесип өтүү" сыяктуу беренелер менен айып тагылды.