БИШКЕК, 8-янв — Sputnik. Укук коргоо органдары Садыр Жапаровдун "Саясатка аралашкан 10 жыл" аттуу китебинде жазылган маалыматтарды текшерүүдө. Бул тууралуу Башкы прокуратуранын маалымат кызматы билдирди.
КР Кылмыш-процессуалдык кодексинин 151-156- беренелерине ылайык, жарандардын арыздарында же башка билдирүүлөрүндө жасалган, же жасоого даярдалып жаткан кылмыштар тууралуу маалыматтар текшерилет.
"Маалыматтар ырасталып, же ырасталбай калган учурда анда айыпталган же болбосо кылмыш жасагандыгы тууралуу атайылап жалган маалымат тараткан адамдарга карата кылмыш ишин козгоо тууралуу чечим кабыл алынат", — деп айтылат билдирүүдө.
Садыр Жапаровдун аталган китеби учурда бир катар интернет басылмаларга жарыяланып, социалдык түйүндөрдө талкууланууда.
