БИШКЕК, 8-янв — Sputnik. Мамлекеттик чек ара кызматынын Ысык-Көл облусу боюнча башкармалыгынын чек арачылары Жети-Өгүз районундагы Кызыл-Эшме аймагынан 7-январь күнү чек араны бузуп өткөн 3 кытай жаранын кармаган. Бул тууралуу аталган кызматтын маалымат кызматы билдирди.
Маалыматка ылайык, кармалган жарандар Кытай Эл Республикасынан Кыргызстандын аймагына өтүүгө аракет кылышкан. Алардын жанында ким экенин аныктай турган эч кандай документ болгон эмес. Кармалгандар Синьцзян-Уйгур автономдуу районундагы Кызыл-Суу кыргыз автономдуу аймагындагы Жамансуу айылынын тургандары экенин айтышкан.
Тинтүү учурунда алдардын жанынан 6 бычак, жергиликтүү аймактын картасы, 369 юань өлчөмүндөгү акча, азык-түлүк жана дарылар табылган.
Учурда чек арачылар УКМК жана ИИМдин аймактык өкүлдөрү менен биргеликте ыкчам-иликтөө иш-чараларын жүргүзүүдө.
Мамлекеттик чек ара кызматынын Ысык-Көл облусу боюнча башкармалыгынын "Карасай" чек ара кызматынын жеке курамы кыргыз-кытай чек арасын күчөтүлгөн режимде кайтарууга өттү.
