БИШКЕК, 6-янв — Sputnik. Былтыр 16-мартта каза болгон Камила Дүйшөбаеванын өлүмүнө Калый Саляновдун тиешеси жоктугу аныкталганын Ички иштери министрлигинин (ИИМ) маалымат кызматы билдирди.
Учурда Дүйшөбаеванын өлүмү боюнча иликтөө иштери улантылып жатканын белгилеген маалымат кызматы, аталган окуя боюнча жүздөгөн адамдар суракка алынып, күбөлөр көрсөтмө бергенин кабарлады.
"Тергөөнүн иши менен толук таанышып жана аталган фактыга байланышкан бардык топтолгон оперативдик иш-чаралардан маалымат алгандан кийин, аталган кылмышка Калый Салянов менен ысымдары аталган башка жарандардын эч тиешеси жок экендиги аныкталгандыгын билдиребиз", — деп айтылат билдирүүдө.
Кылмыштин бетин ачуу максатында көптөгөн иликтөө иш-чаралар жүргүзүлүүдө. Анын ичинде сот органдары тарабынан санкция берилген 500гө чукул уюлдук телефондун абоненттери текшерилген. "Одноклассники", "WhatsApp" социалдык түйүндөрү боюнча азыркыга чейин текшерүүлөр жана аныктоолор жүргүзүлүүдө. Бирок аталган кылмышка тиешеси бар жарандар кармала элек. ИИМ тергөөнүн кызыкчылыгын эске алуу менен иликтөөнүн жүрүшү боюнча толук маалыматты бере албастыгын билдирет.
