БИШКЕК, 6-янв — Sputnik. Бразилияда шаардын сыртына каттоочу поездге ошол эле багытта келе жаткан состав урунуп алды деп билдирет Рио-де-Жанейро штатынын унаа башкармалыгынын жетекчиси Карлос Роберто Осориого таянуу менен РИА Новости.
Окуя Рио-де-Жанейро штатынын Мескита муниципалитетине караштуу "Президент Жуселину" станциясында дүйшөмбү күнү кечинде болду. Шаар сыртына каттоочу поезд токтогон мезгилде анын артынан келе жаткан состав ага урунган.
Осорионун айтымында, куткаруучуларга жардам сурап 69 адам кайрылды. Алардын жаракаттары жеңил жана ооруканаларга жеткирилди.
Окуянын натыйжасында темир жолунун бир бөлүгүндө кыймыл токтоду. Күбө болгондордун берген көрсөтмөлөрүнө караганда, аба ырайынын шартына жараша поезд жай келе жаткандыгы көп сандагы курмандыктардан сактап калды.
