Сурамжылоо 5-17-декабрда Франция, Британия жана Германияда жүргүзүлгөн. Буга бардыгы болуп, 3013 киши (Улуу Британиядан 1001, Германиядан 1001, Франциядан 1011 киши) катышкан. Ар бир өлкө боюнча сурамжылоого тандалып алынгандар жынысы, жаш-курагы жана географиялык өзгөчөлүгү боюнча ар түрдүү топторго кирет. Ишенимдүүлүктүн 95% мүмкүндүгүн эсепке алганда ар бир өлкө боюнча маалыматка болгон ишеним +/- 3,1%ды түзөт.
Экономика илимдеринин доктору Кубанычбек Идинов Sputnik сайтына билдиргендей, Европа биримдигиндеги мамлекеттер колу менен жасаган иштерине мойну менен жооп берүүсү керек, себеби, украиналыктарды бул абалга биримдиктеги мамлекеттер алып келген.
"Кыргызда "эки тууган урушат, эси кеткен болушат" деген жакшы сөз бар. Чын-чынына келгенде, орустар менен украиндер кыргыз менен казактар сыяктуу эле – тили, дили жакын эл. Европа алардын маселесине кийлигишип, адамдын акылы жетпеген каталарды кетирип жатат. Украинанын элин ачкачылыкка жеткирбей, керек болсо аларды камсыздоо милдетин өздөрүнө алыш керек. Мына кыш келди, газга төлөй албай атат",— дейт ал.
Идиновдун айтымында, Украинанын ички дүң өнүмүнүн үчтөн бирин камсыздаган аймактар – Донецк менен Луганск облустарындагы завод-фабрикалар талкаланып, өндүрүш токтоп, өлкөдө жарандык чыр курчуп турат. Экономист ошондой эле, Украина башка мамлекеттердин кийлигишүүсү менен ара жолдо калганын кошумчалады.
Украинага жардам беребиз дегендер, бул өлкөнү эки анжы абалга алып келип койгонун айтты. Алар же Бажы биримдигине кире албай, же Евро биримдикке кире албай ара жолдо калганын, элди ушундай абалга алып келип койгон тарап, аларга жардам бериши керектигин Идинов баса белгиледи.
Белгилей кетсек, ICM Research компаниясы жүргүзгөн изилдөөгө ылайык, Россияга каршы санкциялар Украинадагы каатчылыкты чечпейт деген пикирди европалыктардын үчтөн бири карманары аныкталган.
