БИШКЕК, 26-дек — Sputnik. Казакстандын Ишкерлеринин улуттук палатасы (ИУП) россиялык рублдун курсу төмөндөшүнө байланыштуу ички рынокту коргоо үчүн өкмөт Евразиялык экономикалык биримдиктин (ЕАЭБ) алкагында соода жүргүзүүлөргө убактылуу чек коюшу керек деп эсептейт. Бул тууралуу РИА Новости кабарлады.
"Тенгенин рублга карата бекемделиши Казакстандын экономикасынын өндүрүш секторуна терс таасирин тийгизүүдө. Өкмөт экономиканын өсүшүнө тийип жаткан кесепеттерди төмөндөтүү жолдорун издеп жатат. Ушуга байланыштуу республиканын ИУПу соода жүргүзүүлөргө ЕЭАБ жөнүндө келишимдер мүмкүндүк берүүчү убактылуу чек коюу аркылуу ички рынокту коргоо зарыл деп эсептейт", — деп айтылат ИУПтун маалымат кызматынын билдирүүсүндө.
Ошондой эле Ишкерлердин улуттук палатасы кайра иштетүүчү сектордун ишканаларына, биринчи кезекте айыл чарбасы менен азык-түлүк өнөр жай тармагындагыларга даректүү субсидияларды киргизүүнү сунуштайт.
"Ата мекендик экономиканын импорттон көз карандылыгын төмөндөтүү үчүн ИУП өнөр жайды өнүктүрүү боюнча учурда иштеп жаткан мамлекеттик программалардын алкагында импорттун ордун толтуруу боюнча комплекстүү планды иштеп чыгып киргизүү мезгилге ылайык деп эсептейт. Биринчи кезекте ал план тамак-аш азыктарын керектөөнүн эң аз ченемине кире турган товарларга тиешелүү болушу керек", — деп белгилейт Ишкерлердин улуттук палатасы.
