БИШКЕК, 27-дек — Sputnik. Өлкөдөгү эпизоотикалык абалдын начар болушу бир гана азык-түлүк жаатына терс таасир бербестен, спорт жаатына да жаман таасир берип жатканын Ат спорту боюнча федерациянын вице-президенти жана Айыл чарба министрлигинин байкоочу кеңешинин мүчөсү Манас Султанов маалымат жыйында билдирди.
"Бүгүн Кыргызстанда малдын эти өтө кымбат. Эт жана сүт азыктары Европага салыштырмалуу 1,5-2 эсе кымбат. Баалар асмандын башында. Анан калса, малдын тоюту батыш мамлекеттерине салыштырмалуу 3 эсе кымбат. Ушундан улам, биз кымбат эт, сүт сатып алып жатабыз. Эмнеге андай, анткени бизде эпизоотикалык абал начар. Шарп, сибир жарасы сыяктуу малдын оорулары бар. Анын айынан биз эт менен сүт азыктарын экспорттой албай жатабыз", — дейт ал.
Ал ошондой эле, эпизоотикалык абалдан улам, от спорту да жапа тартып жаткандыгын айтты.
"Өзүбүздүн аймакта мелдештерди өткөрө албаганыбыз аз келгенсип, спортчуларыбыз эл аралык мелдештерге катыша албай жатат. Эгер барып калышса да өз аттары менен эмес, ал жактан атты ижара алышууда. Мындай аракет спортчулардын жетишкен ийгиликтерине терс таасир берип жатат", — деди Султанов.
Султанов өз сөзүндө бул иш 2,5 жылдан бери созулуп келе жатканын, бардык мыйзамдар кабыл алынып, ратификациядан өткөнүн, бирок бир да иш жасалмак тургай, жоопкерчилик ала тургандар белгилене электигин айтты.
