БИШКЕК, 23-дек — Sputnik. Кыргызстан менен Россиянын ортосунда Камбар-Ата – 1 ГЭСинин курулушу боюнча эл аралык экологиялык экспертиза жүргүзүү боюнча кеңешип, сүйлөшүүлөр жүрүп жатканын энергетика жана өнөр жай министри Кубанычбек Турдубаев билдирди.
Кыргыз өкмөтү 2014-жылдын июль айында Камбар-Ата – 1 ГЭСинин техникалык-экономикалык негиздемесин жактырып, орус тараптын кароосуна жиберген. Кубаттуулугу 1 миң 860 мегаватт болчу ГЭСти курууга 3 миллиард доллар керектелет.
"Азырынча эл аралык экспертиза качан болорун айтуу эртелик кылат жана тараптар ортосунда сүйлөшүү жүрүп жатат. Буга кошумча, каржылоо маселеси да чечиле элек", — деди Турдубаев.
Жогорку Нарын каскадына Камбар-Ата – 1 ГЭСин куруу боюнча келишимге 2012-жылдын сентябрь айында Владимир Путиндин Кыргызстанга болгон иш сапары маалында кол коюлган. ГЭСти куруудагы тараптардын үлүшү 50%дан деп белгиленген.
