1961-жылы көп кабаттуу үйлөрдү жылытуу үчүн Жылуулук электр борбору (ЖЭБ) расмий түрдө ишке кирип, ал бүгүнкү күнгө чейин шаардагы үйлөргө жылуулук берип келет. Учурда казан мештерди жана башка жабдыктарды тейлеп 1,5 миң киши эмгектенет. Бир сменада 14 кишиден турган бир нече бригада иштейт.
Жылуулук электр борборунун тейлөө кызматкерлеринин бири бул жакта иштөө кооптуу экенин, себеби, температура миң градуска чейин ысып, ысык суу куурлары жарылып кетиши ыктымалдыгын айтат. Бирок, ошол эле учурда жумуш кызыктуу.
Мекеменин эмгек жамаатында 20 жылдан көп иштеген жумушчулар бар. Жаштар бул жакка келип иштөөнү жактыра беришпейт. Мекеменин башкы инженери Нурбек Базаркулов белгилегендей, кийинки жылы кытайдын ТВЕА компаниясы оңдоо иштерин жүргүзөт. Жабдыктарды жаңылоого 386 миллион доллар сарпталып, оңдоо иштери 2017-жылы аяктайт деп пландалууда.
"Быйылкы кышта ЖЭБ 300 мегаваттка чейинки кубатта иштейт. Январда бул көрсөткүч 315 мегаваттка чейин жогорулайт. Бирок, өкмөт тараптан 360 мегаватт кубатка туруштук берүү боюнча тапшырма болгон", — дейт башкы инженер.
Бир суткада орточо эсеп менен Бишкек жылуулук электр борбору 1 миллион 190 миң киловатт-саат энергия иштеп чыгат. Кышында ал 7-7,5 миллион киловатт-саатка чейин жетет.
