БИШКЕК, 17-дек — Sputnik. Афганистандын "Талибаны" "Техрик-и-Талибан Пакистан" уюмунун согушчандары Пешавардагы аскер окуу жайына кол салгандыгын сынга алды деп билдирет РИА Новости.
"Талибан" террористтик кыймылынын Пакистандагы канаты болуп эсептелген "Техрик-и-Талибан Пакистан" уюмунун согушчандары шейшембиде өлкөнүн түндүк-батышында орун алган Пешавар шаарынын аскер окуу жайын басып алышкан. Окуу жайындагылардын туугандарынын айтымында, террористтер барымтага алынгандарды дароо эле ата баштаган. Теракттын натыйжасында болжол менен 148 курман болгондордун көпчүлүгү окуучулар. Мурдатан талибдер согушчандардын үй-бүлөрүнө каршы операция жүргүзүп жаткан Пакистандын аскерлеринен өч алуу ниетин билдиришкен.
"Күнөөсүз адамдарды, аялдар менен балдарды атайылап өлтүрүү исламдын негиздерине каршы келет, жана бул критерийди ар бир ислам партиясы жана өкмөт карап чыгышы керек", — деп айтылат "Рейтер" агенттиги келтирген афганистандык талибдердин өкүлү Забиулла Муджахиддин билдирүүсүндө.
15-июнда Пакистандын Куралдуу күчтөрү Түндүк Вазиристандын аймагында "Аль-Каиданын", "Талибандын", "Батыш Түркестандын ислам кыймылынын" жана "Өзбекстандын ислам кыймылынын" согушчандарына каршы Зарб-е-Азб деп аталган "универсалдуу операциянын" башталышы тууралуу билдирген.
