БИШКЕК,15-дек — Sputnik. Түркиядагы Zaman гезитинин башкы редактору Экрем Думанлы өлкө жетекчилигине каршы кутумдукка катышкан деген шек менен полиция тарабынан кармалды. Бул тууралуу Hurriyet гезитине шилтеме берүү менен РИА Новости жазып чыкты.
Башкы редактор кармалгандан кийин эртең менен баштап тинтүү жүргүзгөн полиция кызматкерлери редакциянын имаратынан чыгып кеткен. Гезит редакциясынын алдына жүздөгөн кызматкер жана окурмандар колдоруна сөз эркиндигин колдоо боюнча транспаранттарды көтөрүп чыгышты.
Жекшемби күнү түрк ЖМКлары 23 киши кармалгандыгын маалымдаган. Кармалгандардын арасында Samanyolu телеканалынын жетекчиси Хидайет Каража баштаган 10дон ашуун киши бар. Адвокат Тургай Балабандын айтымында, кармалгандар "чет элдик кутумга" катышкан деп айыпталууда.
Ошондой эле терроризмге каршы күрөшүү боюнча Стамбул департаментинин мурдагы башчысы Туфан Эргүдер, Ван, Эрзурум, Түнжели, Мардин жана Ширнак аймактарынын улук офицерлери кармалып, тергөө иштерин жүргүзүү үчүн Стамбулга алынып келген.
Белгилей кетсек, 2013-жылы коррупцияга каршы чоң операция болгон. Андан кийин өлкөдө полиция кызматкерлерин массалык түрдө кармоо аракеттери маал-маалы менен болуп келет. Алардын көбү АКШда жашаган дин аалымы Фетхуллах Гүлен тарабынан каржыланат делген "кош түзүм" бейрасмий уюмун түзүүгө катышкан деп айыпталышууда. Түркия президенти Режап Тайып Гүленди түрк өкмөтүн кулатууну максат кылууда деп айыптап келет. Эрдоган былтыр Түркияда болгон нааразычылык акцияларын жана өкмөт мүчөлөрүнө карата компроматтарды өкмөт түзүмүндө иштеген дин аалымынын жактоочуларынын иштеринен улам келип чыккан деп түшүндүрүүдө.
