БИШКЕК, 25-ноя — Sputnik. Визасыз катташкан мамлекеттердин эмгек мигранттары кийинки жылдан баштап мигранттар менен иштеген компаниялардын расмий тизмесинен жумуш берүүчүлөрдү тандай алышат. Ал Россиянын Федералдык миграция кызматынын (ФМК) сайтында жарыялана турганын "Известия" гезити шейшембиде маалымдаганын РИА Новости билдирди.
"Мындай тизменин бекитилиши чет элдик жарандардын жумуш орундары жөнүндө маалымат алуусуна мүмкүндүк берет. Ошондой эле, жумуш берүүчүлөрдүн тизмесинин болушу алардын Россия Федерациясынан жумуш издөөсүн жеңилдетет. Ушундан улам, долбоор токтому менен учурда чет элдик жарандарды өзүнө тарткан жумуш берүүчүлөрдүн тизмесин сайтка жайгаштыруу сунушталат. Бул визасыз катташкан мамлекеттин жарандарынын жумуш берүүчүлөрдү тез табуусуна мүмкүндүк берет",— деп белгилейт Эмгек министрлиги.
Сайтта компаниянын жумушчу күчүнө болгон муктаждыгы, адистиктер жана талап кылынган жумушчулардын квалификациялык деңгээли да көрсөтүлөт. Мигранттар мыйзамдуу жумушту өзүнүн мүмкүнчүлүгүнө жараша таап, андан сырткары "алдамчылар менен кулчулуктан" коргоно алышат. Ал эми Федералдык миграция кызматы миграция агымын көзөмөлдөө боюнча кошумча мүмкүнчүлүк алат.
Визасыз Россия Федерациясына келип жаткан мигранттарды ишке алууда уруксат берүүчү документ саналган патент системасына өткөрүүнү өткөн жылы мамлекет башчы Владимир Путин тапшырган. Өткөн шаршембиде Федералдык кеңеш эмгек мигранттарын Россияга тартууда квота системасын патент системасына алмаштыруу мыйзамын жактырган.
