БИШКЕК, 20 ноя — Sputnik. Коомдук талдоо институтунун укук коргоочулары Сотторду тандоо кеңешине талапкерлерди бекитүүдө Жогорку Кеңештин депутаттары бир катар мыйзамдарды бузган деп айтышты. Бул тууралуу институттун расмий сайтында маалымдалды.
Жогорку Кеңештин шаршемби күнү болгон жыйынында Сотторду тандоо кеңешине 20 талапкер бекитилген болчу. Калган төрт талапкер кийинки жумада ЖКнын сот-укуктук маселелер боюнча комитетинде каралгандан кийин шайланат.
Укук коргоочулар төмөндөгү негиздерге токтолушууда:
Сотторду тандоо кеңеши жөнүндөгү мыйзамдын 5-беренесине ылайык, талапкерлер коалициялык көпчүлүк менен коалициялык оппозиция тарабынан тандалат. Фракция тарабынан көрсөтүлгөн талапкерлердин бардыгы тең коалициялык көпчүлүккө жана азчылыкка тааныштырылган эмес. Андыктан, алардын тандалуу укугу бузулган.
"Мыйзам бузуулар талапкерлерди фракцияларда кароо учурунда да болгон. Кээ бир фракцияларда талапкерлер таптакыр эле каралган эмес. "Республика" фракциясы талапкерлерди көшөгө артынан эле чечип коюшкан. "Ата-Журт" фракциясында талапкерлерди тандоодо 28 депутаттардын 14ү гана катышкан. Кээ бирлери келбей калган депутаттардын ордуна ишеним каты аркылуу добуш беришкен. Мыйзам боюнча андай кылууга жол берилбейт. Бул өтө одоно ката болуп эсептелет жана добуш берүү жараксыз экенин айгинелеп турат", — деп айтылат билдирүүдө.
Коалициялык көпчүлүк өзүнүн жыйынында 4 талапкерди четке каккан. Андан кийин бир талапкерди гана алмаштырып, четке кагылган үч талапкерди кошуп туруп комитеттин жаңы кароосуна алып чыгышкан.
КР Конституциясынын 74-беренесине, «КР Судьяларды тандоо кеңеши жөнүндө» мыйзамдын 5-беренесине ылайык, Кыргыз Республикасынын Судьяларды тандоо кеңешинин курамында 24 мүчө бар. Жалпы курамдын үчтөн бири парламенттик көпчүлүк коалициясы, үчтөн бири парламенттик оппозиция, үчтөн бири Судьялар кеңеши тарабынан көрсөтүлөт. Алар үч жылдык мөөнөткө шайланат.
