БИШКЕК, 20-ноя — Sputnik. Жогорку Кеңештеги Коргоо жана коопсуздук боюнча комитетинин депутаттары – Ирина Карамушкина, Нурлан Төрөбеков, Курмантай Абдиев жана Алмазбек Баатырбеков шейшемби күнү диний экстремизм жана эл аралык терроризм маселелери боюнча көчмө жыйындын алкагында Оштогу чек ара отрядынын "Араван" жана "Кара-Суу" чек ара тозотунда болуп, жеке курам менен жолугушту. Бул тууралуу Мамлекеттик чек ара кызматынын ЖМК жана коом менен байланыш бөлүмү билдирди.
Депутаттар чек арачылардын социалдык-тиричилик жана кышка болгон даярдыгы менен жеринде таанышты. Депутаттар аскерлердин казармаларын, азык-түлүк сактаган кампаларын жана казан мештерди көрүп чыгышты. Эл өкүлдөрү ошондой эле, Оштогу кинологиялык борбордо, аскерлердин "Түштүк" деп аталган госпиталында жана Оштогу чек ара отрядынын аскер кызматкеринин балдары үчүн салынган бала бакчада болушту.
Мамлекеттик чек ара кызматынын төрагасынын орун басары Абдикарим Алимбаев чек араны бекемдөө боюнча аракеттер жасалып жатканын, быйыл кошумча 2 чек ара өтмөгү коюлса, 3 чек ара өтмөгү чек ара тозоту болуп өзгөртүлгөнүн белгиледи.
Андан сырткары кыргыз-тажик, кыргыз-өзбек чек араларын техникалык жактан жабдып, жакшыртуу боюнча аракеттер улантылып жатканын кошумчалады.
Белгилей кетсек, жалпысынан 22 миң метрден ашык чек ара тосмосу коюлган.
