БИШКЕК, 29-окт — Спутник Кыргызстан. Кыргызстандын президенти Алмазбек Атамбаев кийинки жылдын күзүндө боло турчу парламенттик шайлоо үчүн "туруктуу эрежелер" алдын ала белгилүү болуш керек деп айткандыгы туурасында РИА Новости билдирди.
Кыргызстандын Жогорку Кеңешинин азыркы чакырылышы экс-президент Бакиевдин режими кулагандан кийин бир нече айдын ичинде 2010-жылдын күзүндө шайланган. Ошондой эле, өлкөдөгү мамлекеттик түзүм да өзгөрүп, Кыргызстан парламенттик өлкө болуп, анын башчысы парламент тарабынан дайындалган премьер-министр эсептелет. 2010-жылы 120 орундуу парламенттен орун алуу үчүн 80ден ашуун саясий партия ат салышкан.
"Шайлоо эрежелери (парламенттик шайлоо – ред.) эртерээк белгилүү болсо жакшы болот. Коом жана саясий партиялар шайлоо өтө турчу туруктуу эрежелердин кабыл алынышын күтүп жатат", – деп өлкө башчысы Атамбаев Өлкөнүн туруктуу өнүгүү боюнча улуттук кеңешинин жыйынында билдирди.
Ал ошондой эле, өлкөнүн туруктуу өнүгүү стратегиясына ылайык, шайлоого бир жыл калганда шайлоо боюнча мыйзамдагы өзгөрүүлөр толугу менен аяктап, эрежелер мындан ары өзгөрбөйт деп пландалганын эске салды. Бирок, өлкөнүн парламенти шайлоо жөнүндө жаңы кодексти дагы деле беките элек. Президент андан тышкары элден биометрикалык маалыматтарды чогултуу боюнча улуттук кампаниянын жүрүшү боюнча өкмөттөн отчетту талап кылды. Буга чейин биринчи вице-премьер-министр Тайырбек Сарпашев "биометрикалык маалыматтарын бербеген жарандар, шайлоого киргизилбей турганын" айткан болчу.
Ал ортодо, Кыргызстандын Каржы министри Ольга Лаврова шайлоо участкаларында биометрикалык маалыматтарды эсептей турган жабдыктарды орнотууга каражат өлкөнүн 2015-жылдагы бюджетинде каралбаганын Улуттук кеңештин жыйынында билдирди. "Азыркыга чейин канча каражет керектеле тургандыгы жөнүндө так эсептөөлөр бериле элек", – деди ал.
