БИШКЕК, 22-июн. — Sputnik. Кытайга темир жол аркылуу айыл чарба азыктарын жеткирүү мүмкүнчүлүгү Евразиялык экономикалык биримдиктин мүчө өлкөлөргө берилиши мүмкүн. Бул маселени иштеп чыгуу Евразиялык экономикалык комиссиясы менен “Россия темир жолу” ААКсынын кызматташтыгы боюнча жол картасына киргизилгенин ЕЭКтен билдиришти.
“Кытайга темир жол аркылуу азык-түлүк ташуу биримдиктин потенциалын арттырат. Биримдикке мүчө өлкөлөр айыл чарба продукцияларын өндүрүү боюнча дүйнөдөгү ролу чоң. Мисалы, Россия Кытайга ун, тоңдурулган тоок эти, соя сыктуу товарларды ташып жатат. Эми өнөктөш өлкөлөрдөгү ири долбоорлорду колдонуп, экспорттун санын өстүрүүгө болот”, — деди ЕЭКтин соода боюнча министри Андрей Слепнев.
Ошондой эле ал биримдикке байкоочу катары кирүүнү калаап жаткан Өзбекстанда эт, сүт азыктарын жана жер-жемиш экспорттоо боюнча жакшы мүмкүнчүлүктөр бар экенин айтты.
Маалыматка караганда, мындай кадам ЕАЭБ өлкөлөрүнүн ичинде темир жолду абдан пайдалуу колдонууга шарт түзөт.
ЕЭК биримдикке кирген өлкөлөрдүн бизнес коомчулуктарын бул маселе боюнча диалогго чакырып, эркин соода аймактарындагы мүмкүнчүлүктөрдү бирге издөөгө үндөдү.
