БИШКЕК, 23-янв. — Sputnik. Кытай провинцияларында жаңы типтеги коронавирус менен ооругандардын саны 571 адамга жетти. Бейтаптардын 95и оор абалда экендигин Саламаттык сактоо боюнча мамлекеттик комитетке шилтеме берүү менен РИА Новости жазды.
Буга чейин ооруган 473 бейтаптын 17си каза тапканы айтылган.
Ушул тапта вирус 25 провинцияга жана ири шаарларга жетти.
Өткөн суткаларда 131 адам вирусту жаңыдан жугузуп алганы белгилүү болуп, анын сегизи көз жумган. Каза тапкандардын көбү 65 жаштан өткөндөр экендиги айтылат.
Мындан тышкары, 13 провинциядагы 275 адам жаңы типтеги коронавируска кабылышы мүмкүн деп каттоого алынган.
Учурда оорулуулар менен жакын байланышта болгон 4928 адам медициналык көзөмөлгө алынды.
Дүйнөнүн ар кайсы өлкөлөрү аба майданындагы текшерүүнү күчөтүштү. 22-январь күнү Бишкектеги "Манас" эл аралык аэропортунда Үрүмчүдөн (Кытай) келген жүргүнчүлөр коронавируска текшериле баштады.
Эскерте кетсек, декабрдын аягында Ухань шаарынын Хубэй провинциясында белгисиз өпкө оорусунун жайылганы байкалган. Адистер дарттын козгогучу коронавирустун 2019-nCoV деп аталган жаңы тиби экендигин боолголошкон.
Ал арада ЖМКлар Ухань шаарында сыртка чыгууга убактылуу тыюу салынып жатканын жазышты.
"Бейшемби күнү шаар бийлиги эпидемиялык абалга байланыштуу автобус менен метронун ишин, ошондой эле учак менен вокзалдагы каттамдарды токтотту", — деп айтылат маалыматта.
Аталган калаанын калкы 11 миллион адамды түзөт.
Коронавирус өзүнө отуздан ашык вирусту камтыйт. Алгач ирет 1965-жылы пайда болгону байкалган. Адамдардын, үй жаныбарларынын, куш, чочко, ири мүйүздүү малдын саламаттыгын жабыркатат. Оорудан дем алуу органдары, ичеги-карын, нерв системасы зыян тартат.
