Англиянын жаңы банкнотторунан ката табылды

БИШКЕК, 29-апр. — Sputnik. Англиянын банкы жаңы басып чыгарган 5 фунт номиналындагы банкнотто пунктуациялык ката бар экенин Telegraph басылмасы жазып чыкты. 

Жаңы банкнотто Улуу Британиянын премьер-министри болгон Уинстон Черчилдин "Мен силерге кан, эмгек, көз жаш жана терден башка эч нерсе сунуштай албайм" (I have nothing to offer but blood, toil, tears and sweat) деген цитатасы жазылган.

Дизайндын долбоорунда пунктуациялык бардык эрежелер сакталган, бирок басып чыгарылган купюрада тырмакча менен чекит алынып калган.

"Премьердин цитатасын беш фунт номиналындагы купюра айтып жаткандай болуп жатат. Бул жерде чекит менен тырмакча коюлушу керек болчу", — деп Оксфорд университетинин профессору Тара Стаббс оюн билдирди.

Англиянын банкы азырынча бул боюнча түшүндүрмө бере элек.

Желимден жасалган жаңы үлгүдөгү 5 фунттун айланасында буга чейин да чыр чыккан. Былтыр сентябрда колдонууга берилген банкнотторду жасоодо жаныбарлардын майлары да колдонулганын айбанаттарды коргоочулар аныкташкан.