БИШКЕК, 10-мар. — Sputnik. Ирандын ислам революциясынын коргоочулар корпусу өздөрү чыгарган Hormuz-2 (Ормуз-2) деп аталган баллистикалык жаңы эки ракетаны сынады. Бул туурасында РИА Новости Tasnim агенттигине шилтеме кылып кабарлады.
Маалыматта бул кубаттуу куралдар деңиздеги бутаны жок кыла тургандыгы айтылган.
Аталган корпустун командири Амир Али Хажизаде сүзүп жүргөн бутаны 250 чакырымдан жок кылууга болору сыналганын билдирди. Ал эми агенттик ракета 300 чакырымда бутага так тиерин жазды.
Буга чейин Fox News телеканалы өзүнүн маалымат булактарына таянып, Иран март айынан тарта кыска аймакка атылуучу "Фатех-110" деп аталган баллистикалык эки ракетасын сыноону баштагандыгын жазган. Алардын бири атылган аралыктан 250 чакырым аралыкта Оман булуңунда жүргөн баржаны талкалап кеткен.
