БИШКЕК, 9-дек. — Sputnik. Түштүк Американы кыдырып саякаттап жүргөн италиялык турист адашып Рио-де-Жанейронун түштүк бөлүгүндөгү районго кирип кетип кылмышкерлер тарабынан атып өлтүрүлгөн. Бул тууралуу Рейтер агенттигине шилтеме берип РИА Новости билдирди.
16 Жетинин айы 2016, 20:38
Маалыматка ылайык, полиция кызматкерлери өлтүрүлгөн адамдын аты-жөнүн тактап, ал 52 жаштагы Италиянын тургуну Роберт Барделл болуп чыкты. Ал досу (ал дагы италиялык) экөө мотоцикл менен саякаттап жүрүп GPS аркылуу багыт алып, кокусунан Рионун начар кварталына кирип кетишкен.
Ал жакта кылмышкерлер туристтерге ок атып, мотоциклден түшүүнү буйруган. Барделл алган жараатынан ошол жерден көз жумуп, анын досу коё берилген.
5-августтан 21-августка чейин Рио-де-Жанейродо кылмыштуулуктун көптүгүнө карабай Олимпиадалык оюндар өткөрүлгөн. Экономикалык төмөндөө, жумушсуздардын санынын көбөйүшү жана бюджеттин тартыштыгы криминалдык топтордун бүтүндөй райондорду ээлик кылуусуна алып келген.
