Жогорку Кеңештин депутаттары бүгүн уран жана радиациялык коопсуздук маселеси боюнча өкмөттүн маалыматын угуп жатат. Боронов эл өкүлдөрүнүн алдына кирип бара жатканда журналисттер андан Кара-Сууга кандай максатта барганы боюнча суроо салган.
"Биринчиден, мен Райым Матраимовго барган жокмун, мен Искендер Матраимовго бардым. Экинчиден, ал дем алыш күнү болчу. Жеке сапар", — деди да, башка суроолорду четке кагып кирип кетти.
Белгилей кетсек, Райым Матраимов учурда өкмөт менен соттошуп жатат. Аны 2017-жылы ноябрда ошол кездеги премьер-министр Сапар Исаков "ишенимден чыкты" деген жүйө менен кызматтан кетирген. Исаков премьерликтен кеткенден кийин Матраимов негизсиз иштен алынганын айтып, өкмөттү сотко берип, мурунку кызматына турууну суранган. Аны райондук жана шаардык сот канааттандырган. Ал эми өкмөт Жогорку сотко кайрыларын же анын кызматка келишине макулдугун берүү боюнча пикирин айта элек.
Мындан сырткары, ушул жылдын январынан тарта Финпол Матраимовдун мүлкүн текшере баштаган. Азырынча анын жыйынтыгы жарыялана элек.
