Машыгуу ИИМдин "Динамо" спорттук базасында өтүп, видеого түшүү үчүн ар кайсы башкармалыктын милиция кызматкерлери эки саатка чогулуп берди.
Ведомствонун кадрлар башкы башкармалыгынын дене тарбия бөлүмүнүн башчысы Изатбек Чалабаев күч түзүмдөрү милдеттүү түрдө спорт менен алектениши керектигин айтып берди.
"Буйрук боюнча кызматкерлер жумасына эки жолу эки сааттан кем эмес машыгуусу керек. Программада турникке тартынып, пресс жасап, чуркап, ченемдерди (норматив — ред.) тапшыргандан сырткары эң бир керектүү делген күжүрмөн самбо каралган. Бул спорт өзүңдү жана жарандарды коргоодо, тартип бузгандарды колго түшүрүп, кээде алардын соккуларынан буйтап, каршы аракеттерди жасоодо абдан керек. Мындан сырткары, кылмышка шектүүнү кармаганда колун кантип байлап, кишен салуу керектигин үйрөтөбүз", — деди Чалабаев.
Ал белгилегендей, кызматкерлер жылына эки жолу — күзүндө жана жазында дене тарбия боюнча нормативдерди тапшырат.
Чалабаев кандай учурда машыгуудан баш тартууга боло турганын айтып берди.
"Милиция кызматкерлери ооруп, ден соолугун калыбына келтирип жаткан болсо, аялдар кош бойлуу учурунда машыкпай кое алат. Бирок, албетте, медициналык тастыктамасы болушу керек. Ошондой эле спорт менен профессионалдуу түрдө алектенип, курама командада өлкө намысын коргоп жүргөндөр башкармалыктын уруксаты менен бошотулат. Мындан сырткары, мамлекеттеги өзгөчө кырдаалдарга карап күчөтүлгөн тартип киргизилсе, спорттон мурда ишибиздин кызыкчылыгына көңүл бурабыз", — деди Чалабаев.
Кадрлар башкы башкармалыгынын дене тарбия бөлүмүнүн башчысы Изатбек Чалабаев кошумчалагандай, кызматкерлердин арасында шыгына жана кызыгуусуна жараша спорттун кошумча түрлөрү менен алектенгендер арбын.
