БИШКЕК, 18-авг. — Sputnik. Кыргызстандын футбол боюнча кубогу мелдешинин 2021-жылдагы финалы Баткен шаарында өтөт. Бул тууралуу калаа мэриясынын маалымат кызматы билдирди.
Бул аталган шаарда өткөн эң ири футболдук беттеш болуп калат.
Өлкөнүн футбол боюнча премьер-лигасынын аткаруучу директору Михаил Толкачев Баткенге барганда шаар мэри Имамназар Бурканов менен жолуккан. Анда Кыргызстандын футбол боюнча кубогунун финалдык беттешин Баткен шаарында өткөрүү боюнча сүйлөшүү жүргөн. Оюн 18-сентябрга белгиленүүдө.
Белгилей кетсек, аталган мелдеште учурда "Алга" (Бишкек) — "Дордой" (Бишкек) жана "Алай" (Ош) — "Нефтчи" (Кочкор-Ата) командалары беттешип жатат. Алардын жеңүүчүлөрү өлкө кубогунун финалында ойношот.
Мелдешти өткөн жылы Оштун "Алай" клубу уткан.
