БИШКЕК, 27-июл. — Sputnik. Бүгүн, 27-июлда, Токиодо өтүп жаткан Олимпиада оюндарында кыргызстандык дзюдочу Владимир Золоев менен суучул Денис Петрашов күчүн сынайт.
Золоевдин салмагындагы (81 килограмм) атлеттер 8:00дөн тарта чыгышат. Дзюдочулар 16/1 финалдан баштайт. Чүчүкулак боюнча кыргызстандык спортчу россиялык Алан Хубецов менен таймашат.
Белгилей кетсек, Олимпиада оюндарына чейин Золоевди колдоо иретинде япониялыктар, тагыраагы, хамуралыктар кыргыз гимнин ырдашкан эле.
Денис Петрашов саат 16:00дө күч сынашат. Бул ирет 200 метр аралыкка брасс ыкмасында сүзөт. Буга чейин, 24-июлда, 100 метрлик аралыкка брасс ыкмасында сүзүү жарышында жеке рекордун жаңырткан. Бирок бул ага мелдештин жарым финалына чыгууга жардам берген эмес. Мындай көрсөткүч менен кыргызстандык спортчу 27-орунду ээлеген.
