БИШКЕК, 1-апр. — Sputnik. Хоккей боюнча Кыргызстандын курама командасы Дүйнө чемпионаты-2020 оюндарынын тандоо турунда Кувейттин оюнчуларын 14:0 эсебинде жеңип алды. Бул тууралуу Кыргызстандын Хоккей федерациясынын вице-президенти Мурат Жакыпов билдирди.
Тандоо турунун алкагындагы биринчи оюн 31-мартта Абу-Даби шаарында өткөн. Кыргызстандыктар эми Босния жана Герцеговина, Гонконг, Бириккен Араб эмирлиги жана Таиланддын курама командалары менен беттешет.
Кыргызстандык оюнчулардын беттеше турчу күндөрү:
- 1-апрель — Кыргызстан — Таиланд;
- 3-апрель — Кыргызстан — Босния жана Герцеговина;
- 4-апрель — Кыргызстан — Гонконг;
- 6-апрель — Кыргызстан — Бириккен Араб эмирлиги.
Хоккей боюнча дүйнө чемпионаты 2020-жылы 1-17-майда Швейцариянын Цюрих жана Лозанна шаарларында өтөт. Эгер Кыргызстандын курамасы тайпасынан чыкса, үчүнчү дивизионго кирип, Дүйнө чемпионатына катышууга укук алат.
