БИШКЕК, 23-ноя. — Sputnik. Борбор каладагы Кожомкул атындагы спорт сарайында Бүткүл дүйнөлүк кулатуу эр таймаш федерациясынын "WEF Global 10: Улуу жибек жолунун баатырлары" аттуу эл аралык юбилейлик турнири болуп өттү.
Турнир алкагында 18 беттеш болуп, анын үчөөндө алты мушкер WEF уюмунун чемпиондук куру үчүн күч сынашты.
Башкы беттешке биринчилерден болуп “Алгыр” каймана аты менен таанымал кыргыз мушкери Актилек Жумабек уулу россиялык Магомедрасул Магомаев менен чыгып биринчи раундда техникалык нокаут менен жеңишти камсыздады. Андан соң “Азия аюусу” аталган өзбекстандык Мурод Хантураев Россиядан келген Константин Андрейцев менен кез келип биринчи раунда эле техникалык нокаут менен жеңилип калды. Ал эми “Сайфулло” каймана аты бар кыргызстандык Кылычбек Саркарбаев АКШнын намысын коргогон Али Мухаммед менен беттешип чемпиондукту колдон чыгарып жиберди.
Мындан сырткары рейтинг үчүн 15 жуп күч сынашууга чыккан. Беттеште Украина, Россия, Америка, Өзбекстан, Тажикстан, Казакстан жана Кыргызстандын мушкерлери ат салышты.
