БИШКЕК, 20-июл. — Sputnik. Кыргызстандын футбол боюнча курама командасы ирандыктардан 1:2 эсебинде утулуп калды. Бул тууралуу өлкөнүн футбол федерациясы билдирди.
Маалыматка ылайык, беттеш 19-июлда саат 19.00дө Дөлөн Өмүрзаков атындагы стадиондо өткөн. Оюндун 11-мүнөтүндө Роман Левченко Иран командасынын дарбазасына биринчи топту киргизе алган. Андан үч мүнөт өтпөй ирандык футболчу Реза Шекари ийгиликтүү чабуул жасап эсепти теңдеген.
Ал эми беттештин биринчи бөлүгү соңуна чыгып калганда Али Голизаде кыргызстандыктардын дарбазасына дагы бир топ киргизген.
Экинчи таймда командалар бири-бирине гол киргизе алышкан эмес.
Иран, Оман жана Кыргызстандын футбол боюнча улуттук курама командалары Бишкекте оюн өткөрөт. Үч команда 2018-жылы Кытайда өтө турган Азия биринчилигинин финалдык бөлүгүнө жолдомо алуу үчүн күч сынашат. Кийинки беттеш 21-июлда Кыргызстан менен Оман курама командаларынын ортосунда болот.
