БИШКЕК, 29-янв. — Sputnik. Ultimate Fighting Championship (UFC) турниринин расмий YouTube каналы кыргызстандык мушкер Валентина Шевченко менен UFC турниринин эң жеңил салмактагы чемпиону Нуньес менен айтышкан видеосун жарыялады.
Белгилей кетсек, кыргызстандык мушкер Валентина Шевченко венесуэлалык Жулианна Пенья менен UFC турниринин алкагында беттешип, утуп алды. Андан соң рингде сөз сүйлөгөн Валентина учурдагы чемпион Нуньес менен беттешүүгө даяр экенин айтты.
"Мен Нуньести жеңип, чемпиондук титулун утуп алам", — деди Шевченко.
Ошол учурда залда отурган Нуньес рингге чыгып, Шевченкого жооп кайтарды.
"Сен мени жеңе албайсың. Мен сенден күчтүү экендигимди дагы бир ирет далилдеп, сазайыныңды берем", — деди Нуньес.
Ал эми Шевченко атаандашын этият сүйлөөгө чакырып, айткан сөздөрү тескерисинче болуп калышы мүмкүндүгүн кошумчалады.
Белгилей кетсек, буга чейин Аманда Нуньес менен Валентина Шевченко беттешип, кыргызстандык спортчу утулуп калган.
