БИШКЕК, 6-мар. — Sputnik. Кыргызстандык тайбоксчу Валентина Шевченко UFC турниринин алкагында бразилиялык мушкер Аманда Нуньестен жеңилип калды
UFC турниринин алкагында кармаш 5-март күнү АКШнын Лас-Вегас шаарында өттү.
Үч раунддук кармаштын жыйынтыгында калыстар 27 – 30 упай менен жеңишти Аманда Нуньеске ыйгарышты.
КРдин тайбокс федерациясынын президенти Елена Шевченконун айтымында Валентинанын беттешти жеңүүгө мүмкүнчүлүгү бар эле.
"Валентина нокаут менен эле жеңбесе, кармаштын жыйынтыгы алдын ала белгилүү болуп калган. Биринчи раундда Валентина активдүү чабуул жасаган жок, бирок так соккуларды узатып жатты. Экинчи раундда бразилиялык мушкер кармашты партер ыкмасына салып, өз пайдасына алып кетти. Ал эми үчүнчү бөлүктө Валентина жакшы упай топтой алды", — дейт федерация президенти.
UFC турниринин алкагында Валентина Шевченко үчүн бул кармаш алгачкы жеңилүү болду.
Валентина Шевченко өткөн жылдын декабрь айында UFC турниринин алкагында "Strikeforce" чемпиону Сара Кауфманды жеңип алган.
