БИШКЕК, 22-сен. — Sputnik. Кыргызстандын футбол боюнча курама командасы (U-19) Азия чемпионатынын тандоо туруна даярдык көрүү үчүн Катарга жөнөп кеткенин Футбол федерациясы билдирди.
Оюндар Доха шаарында 2-6-октябрь күндөрү өтөт. Кыргызстандын 19 жашка чейинки футболчуларына Оман, Ливан жана Катар командалары атаандаш болот.
Турнирге катыша турган 43 команда батыш (25) жана чыгыш (18) болуп эки аймакка бөлүнгөн. Он тайпанын жеңүүчүлөрү жана экинчи орунду ээлеген беш команда эмдиги жылы Бахрейнде өтө турган финалдык беттешүүгө жолдомо алат.
Финалдык раундга 16 команда катышат. Эгер оюнду кабыл алып жаткан Бахрейн "F" тобунда мыкты аталып, же экинчи орун алгандардын катарында болуп калса, экинчи сапта турган алтынчы команда финалдык оюнга катышуу мүмкүнчүлүгүнө ээ болот.
