БИШКЕК, 7-окт. — Sputnik. Ош шаарынын мурдагы мэри Мелис Мырзакматов аянтта чогулуп турган миңдеген адамдар менен жолукту.
Ал Бишкектегилер менен дагы сүйлөшүп жатканын айтып, өлкөгө темирдей тартипти, мамлекетке мыйзамдуулукту орнотууга жардамдаша турганын билдирди. Ал эми кечээ кызматын тапшырган экс-мэр Таалайбек Сарыбашов жана анын ордун ээлеп алган Дүйшөн Төрөкулов менен да сүйлөшө турганын белгиледи.
"Душка" (Дүйшөн Төрөкулов — ред.) менин кадрым, аны мурда өзүм Спорт комитетинин жетекчилигине койгом. Аны менен өзүм сүйлөшөм. Таалай (Сарыбашов — ред.) иним менен дагы сүйлөшөм, ал да жакшы иштерди жасап келген патриот жигит, бизге тартипти орнотууга жардам берет. Эртең менин командамды күтөсүңөр. Эгер баары мыйзамдуу боло турган болсо, эс ала бересиздер. Болбосо бир команда менен ушул жерге топтолобуз да, Бишкекке талабыбызды айтабыз, аны аткарбаса биз да өзүбүздүн билгенди жасайбыз", — деди Мырзакматов.
Белгилей кетсек, кечээ Ош шаарынын мэри Таалайбек Сарыбашов кызматын тапшырган. Андан соң Жогорку Кеңештин депутаты Дүйшөн Төрөкулов калаа башчысынын кабинетине күч менен кирип барып өзүн мэр деп жарыялаган.
Элдик кошуундун мүчөлөрү мамлекеттик резиденцияга кеткен жолду торошту. Видео
Бирок сырттагы адамдар Мырзакматовду кызматка коюуну талап кылып турушкан.
Мелис Мырзакматов 2014-жылдын ноябрында шаарды аралап өтчү асма көпүрөнү салууда коррупциялык иштерге барган деп айыпталып, издөө жарыяланган. Бирок бул убакта ал өлкөдөн чыгып кетүүгө үлгүргөн. Кийин 2015-жылдын июль айында жети жылга сыртынан кесилген.
