БИШКЕК, 24-сен. — Sputnik. Президент Сооронбай Жээнбеков УКМК төрагасы Орозбек Опумбаев менен онлайн кеңешме өткөргөнүн мамлекет башчынын маалымат кызматынан билдиришти.
Опумбаев президентке өлкөнүн улуттук коопсуздугун камсыз кылуу, коррупцияга каршы жүргүзүлүп жаткан күрөш тууралуу иштер жана Коопсуздук кеңешинин чечимдерин ишке ашыруу чаралары жөнүндө маалымат берген. Ошондой эле ал Жогорку Кеңеш шайлоосуна даярдык көрүү, анын алкагында УКМК, ИИМ жана Башкы прокуратуранын биргелешкен иш планы даярдалганын маалымдаган
Мындан тышкары, улуттук коопсуздук органдары тарабынан шайлоо маалында коомдук-саясий кырдаалды дестабилдештирүүгө жол бербөө жана өлкөнүн стратегиялык объектилеринин антитеррористтик коопсуздугун камсыз кылуу боюнча иш-чаралар уюштурулганы кошумчаланды.
Коопсуздук кеңеши коррупцияга каршы күрөштүн 4 жылдык долбоорун иштеп чыкты
Жээнбеков шайлоо процессин уюштурууда коомдук коопсуздукту камсыз кылуунун, өлкө аймагына экстремисттик жана террордук уюмдардын мүчөлөрүн киргизбөө максатында чек ара тилкелерине көзөмөлдү күчөтүү керектигин эске салды.
Сөзүнүн аягында президент УКМКнын аймактык бөлүмдөрүн коррупциялык схемаларды аныктоо боюнча иштерин күчөтүүгө чакырды.
