БИШКЕК, 9-сен. — Sputnik. Билим берүү жана илим министрлигине караштуу "Жаңы китеп" мекемеси 12 380 даана окуу китебин басып чыгарды. Бул тууралуу министрликтин маалымат кызматы кабарлады.
Билдирмеге ылайык, "Көркөм өнөр" жана "Технология" дисциплиналары боюнча кыргыз жана орус тилдериндеги окуу китептер 5-6-класстын окуучуларына арналган.
Беш тилде окуса болот. Баткенде 22 мектепке электрондук китепкана орнотулду
Басып чыгарылган китептердин 2 335и Бишкек шаарындагы мектептерге берилген. Ал эми Чүй облусуна 8 800, Ысык-Көл облусуна 960 даана китеп жөнөтүлгөн.
Мекеме жетекчиси Төлөгөн Аматов окуу китептерди басып чыгаруу үчүн каржы булактарын табууга пандемия тоскоолдук жаратканын айтты.
"Бул окуу китептер жакынкы 5 жылга ижарага берилет. Андан түшкөн каражатка жаңы окуу китептери басып чыгарылат. Бир жылдын ичинде ар кандай уюмдар, эл аралык фонддор жана жеке компаниялар менен жаңы окуу китептерин басып чыгарууну каржылоо маселесин сүйлөштүк. Тилекке каршы, пандемия өзгөрүүлөрдү киргизип, кызматташууга кызыкдар болгон көптөгөн уюмдар долбоорлорду ишке ашырууну убактылуу токтотушту. Бирок ишти ага карабай улантып жатабыз", — деген Аматов.
Китептерди басып чыгаруу ишин Катардын кайрымдуулук фонду каржылаган.
