БИШКЕК, 27-авг. — Sputnik. Окуу жылы башталганда айылдарда интернет жок деген маселе жаралбашы керек. Андыктан тийиштүү мамлекеттик органдар ишти күчөтүлгөн тартипте жүргүзүүсү абзел. Бул тууралуу өкмөт башчы Кубатбек Боронов санариптештирүү боюнча 2020-жылдын I жарым жылдыгында аткарылган иштерди талкуулаган кеңешмеде айткан.
Өкмөттүн маалымат кызматынын кабарлаганына караганда, Боронов "Санарип аймак" системасын жылдын аягына чейин толугу менен жүзөгө ашырууну тапшырган. Бул системаны жүзөгө ашыруу жергиликтүү өз алдынча башкаруунун натыйжалуулугун жогорулатары айтылып келет.
"Ошондуктан системаны аймактардагы шаарлар менен айыл өкмөттөргө киргизүү иштери күчөтүлүүгө тийиш. "Санарип аймакты" жүзөгө ашыруу үчүн айыл өкмөттөр маршрутизаторлор (роутер) менен ыкчам тартипте камсыздалышы шарт", — деген Боронов.
Кыргызстанда "Санарип аймак" системасына 176 айыл өкмөт кошулду
Кеңешмеде саламаттык сактоо, билим берүү тутумдарын санариптештирүү маселеси да талкууланган.
Премьер-министр мектеп окуучулары пандемияга байланыштуу аралыктан окуусун эске алганда аймактарда интернеттин жеткиликтүүлүгүнө жана сапатына өзгөчө көңүл буруу керектигин белгилеген.
"Окуу жылы башталганда айылдарда интернет жок деген маселе жаралбашы керек. Бул боюнча тийиштүү мамлекеттик органдар ишти күчөтүлгөн тартипте жүргүзүүсү абзел. Мектептерди сапаттуу, жогорку ылдамдыктагы интернет менен камсыздоо боюнча иштер күчөтүлсүн. Ал эми саламаттык сактоо тутумунда санариптештирүү боюнча бир катар алгылыктуу иштер жасалды. Ошентсе да аймактардагы медициналык мекемелерге кеңири масштабдагы маалыматтык технологияларды киргизүүнү аягына чыгаруу зарыл", — деген өкмөт башчы.
Боронов: өлкө боюнча 65 616 окуучуда смартфон жок экени аныкталды
Билим берүү жана илим министрлигинин маалыматына ылайык, өлкө боюнча 2292 мектептин 99 пайызы интернетке туташтырылган.
Жыйында мамлекеттик органдардын санариптештирүү боюнча аткарып жаткан иштери талкууланып, бул багыттагы жумуштары кечеңдеп жаткан айрым тармактардын жетекчилерине бир катар милдеттемелер коюлганы кабарланды.
